Sakeliga en sy regsverteenwoordigers finaliseer tans ‘n substantiewe aansoek om minagting van die hof teen die minister van samewerkende regering en tradisionele sake, haar departement en sy direkteur-generaal.
Die aansoek spruit uit ‘n bevel wat deur die Gautengse afdeling van die hooggeregshof Pretoria op 9 November 2022 toegestaan is. Die bevel verplig die minister, die nasionale departement van samewerkende regering, die direkteur-generaal van die departement en die departement se inligtingsbeampte om Sakeliga te voorsien van alle dokumente en inligting met betrekking tot die rampbestuurregulasies wat in 2020 deur die minister afgekondig is.
Ten spyte van talle pogings deur Sakeliga en sy regsverteenwoordigers om nakoming van die bevel sedert Desember 2022 te verseker, volhard die minister en haar departement in hul minagtende weiering om die bevel na te kom.
Dit verg melding dat ‘n kabinetskommeling in Maart 2023 ‘n vertraging in die nastrewing van die afdwinging van die bevel veroorsaak het. Dit was as gevolg van veranderinge in die ministeriële kantoor en herstrukturering van die departement tussen Maart en Mei 2023. Voor die herstrukturering en gedurende die Covid-19-rampbestuurtydperk het dr Nkosazana Dlamini-Zuma die amp van die minister beklee, tot 6 Maart 2023, waarna me Thembi Nkadimeng as die minister van samewerkende regering en tradisionele sake aangestel is. Dr Dlamini-Zuma dien tans as ‘n minister in die presidensie en sal ook by die aansoek gevoeg word weens haar rol in die weiering van toegang gedurende die tydperk vanaf Desember 2022 totdat sy die amp van die minister in Maart vanjaar ontruim het.
Korrespondensie wat in Augustus 2023 van die staatsprokureur ontvang is, wat namens die nuwe minister en haar departement optree, het nie net erken dat die minister en haar departement bewus is van Sakeliga se eis vir nakoming van die hooggeregshof se bevel nie, maar ook bevestig dat hulle sal voortgaan om hul voorgangers se gedrag te volg en nie die vereiste toegang tot die rampbestuurrekords sal verleen nie.
Die aansoek is tans in sy finale stadium van afhandeling voor uitreiking. ‘n Verdere persverklaring sal uitgereik word by die indiening van die hofstukke, wat binne die volgende paar weke verwag word.